Autoriteti Rrugor Shqiptar ka garantuar financimin e përfundimit të punimeve të mbetura në nyjen e Milotit dhe plotësimin me rrugët dytësore. Qeveria ka akorduar një shumë prej 1.6 miliard lekësh dhe tanimë punimet kanë rifilluar me synim përfundimin brenda një periudhe 15 mujore të të gjithë veprës infrastrukturore. Nyja është strategjike për trafikun pasi lidh Rrugën e Kombit me aksin që shkon nga Tirana drejt Shkodrës.
Ministri i Infrastrukturës dhe Energjisë Damian Gjiknuri bashkë me drejtorin e Autoritetit Rrugor Shqiptar Afrim Qendro ishin në kantier ku thanë se ndërsa punimet do të vazhdojnë, nyja do të fillojë të bëhet funksionale për kalimin e mjeteve duke nisur nga muaji Gusht me synim lehtësimin e trafikut të mjeteve në sezonin turistik.
“Jemi në nyjen e Milotit. Ka pak ditë që është lidhur kontrata për përfundimin e punimeve të ngelura dhe plotësimin me rrugë dytësore për gjithë nyjen e Milotit. Është një vepër që ka shumë vite që ka filluar, kishin ngelur punimet të pabëra. Kjo nyje nuk mund të futej në shfrytëzim nëse nuk bëhej ky projekt i ri dhe kjo garë e re. E kemi nisur punën dhe përfundimisht brenda 15 muajve kjo nyje do të përfundojë me të gjitha zgjidhjet e plota teknike. Do të bëhen rrotull me 9 kilometra rrugë në gjithë zonën që është përreth nyjes dhe gjithë komunitetet e bizneset do të kenë akses të plotë kalimi në përputhje me të gjitha rregullat dhe normat e qarkullimit rrugor. Ndërkohë që përfundimisht kjo nyje do të jetë funksionale dhe me elementët e sigurisë rrugore sicc duhet”, nënvizoi Qendro.
Ministri Gjiknuri theksoi se po i jepet zgjidhje një problem që ka filluar që në vitin 2011 pasi bëhet fjalë për një nga nyjet kryesore të trafikut në Shqipëri.
“Situata që ka qenë deri më tani ka qenë provizore dhe ka krijuar probleme të mëdha me trafikun. Me ndërhyrjet e shpejta dhe me financimet shtesë që mundësoi qeveria shqiptare, përfshirë dhe procedurën e re që sapo u përfundua dhe që u lidh kontrata, do të bëjmë të mundur që të paktën nyja të fillojë të funksionojë për periudhën e verës. Pavarësisht se vepra do të dojë më tepër se një vit që të përfundojë plotësisht”, u shpreh Gjiknuri.
Ai sqaroi se është komunikuar me kompaninë kontraktore që të bëjë të mundur fillimin e funksionimit të kësaj nyje që në muajin Gusht, brenda masave të sigurisë.
“Edhe gjatë kësaj vere, gjithë pushuesit do ta ndjejnë diferencën e madhe që do të ketë lehtësimi i trafikut pikërisht në këtë nyje. Kjo është një nga ato veprat e tjera të rëndësishme që ne jemi duke hapur. Këtu do të jetë edhe lidhja me autostradën nga Miloti deri në Balldren. Pra, po të shikoni pjesa tjetër për nga veriu, një aks me të gjitha parametrat e nevojshme dhe që është pjesë e programit të rindërtimit të infrastrukturës në katër vitet e ardhshme në Shqipëri”, nënvizoi Gjiknuri.
